José Ramón Lete mantivo esta reunión acompañado polo alcalde da Pobra, Isaac Ventura, co que tivera un encontro uns minutos antes. Na charla asistiron clubs como A Portela de fútbol sala, que organiza unha liga de veteranos con máis de 150 participantes, o Adecio Dea de tenis de mesa, a Asociación de Atletismo e de Deportes do Barbanza, o Club de Tenis Punta Salera ou o Pobra de fútbol, entre outros.

O secretario xeral aproveitou a ocasión para explicar os proxectos do seu departamento, así como as políticas deportivas da Xunta de Galicia nun ano que cualificou como o dos clubs “como está quedando patente nas nosas decisións”, manifestou.

Logo da reunión cos clubs o secretario xeral para o Deporte recibiu a dous novas atletas da Pobra, que no último Campionato de España de categoría cadete de pista cuberta lograron subir ao podio. Iria Delgado fíxoo para colgar a medalla de prata en triplo salto e Ana Peleteiro para recoller a de ouro en salto de lonxitude. Acompañado polo alcalde fíxolles entrega dun recordo.

Antes de acudir ao Campionato Galego de cros, José Ramón Lete asistiu á presentación do proxecto do campo de fútbol de Cadreche e visitou a parcela da rúa Gasset onde está previsto a construción dunha pista de multixogos cun orzamento de preto de 60.000 euros e que se inclúe no programa de instalacións para o fomento da actividade física e o deporte.